ກອງປະຊຸມຜູ້ບໍລິຫານອາຊີວະສຶກສາທົ່ວປະເທດ ປະຈຳສົກຮຽນ 2023-2024 ສໍາເລັດເມື່ອທ້າຍເດືອນ ກັນຍາ 2024 ທີ່ຫ້ອງປະຊຸມວິທະຍາໄລ ເຕັກນິກ-ວິຊາຊີບ ການລົດໄຟ, ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ໜູພັນ ອຸດສາ ຄະນະພັກກະຊວງ, ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ໃຫ້ກຽດເຂົ້າຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ພ້ອມດ້ວຍເລຂາທິການປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ຫົວໜ້າຫ້ອງການກະຊວງ, ຫົວໜ້າ/ຮອງຫົວໜ້າກົມ, ຜູ້ອຳນວຍການ/ຮອງຜູ້ອຳນວຍການສະຖາບັນ, ສູນ, ວິທະຍາໄລ ແລະ ໂຮງຮຽນອາຊີວະສຶກສາ, ຮອງປະທານສະມາຄົມສະພາທີ່ປຶກສາພາກເອກະຊົນ, ຫົວໜ້າ/ຮອງຫົວໜ້າພະແນກ, ພະນັກງານວິຊາການ, ຊ່ຽວຊານໂຄງການ, ຄູ່ຮ່ວມພັດທະນາ ຝ່າຍລາວ ແລະ ຕ່າງປະເທດ ທັງໝົດ 100 ກວ່າທ່ານ.

ກອງປະຊຸມຄັ້ງນີ້, ບັນດາຜູ້ແທນໄດ້ຮັບຟັງບົດສະຫຼຸບການຈັດຕັ້ງປະຕິບັດແຜນພັດທະນາວຽກງານອາຊີວະສຶກສາ ແລະ ຝຶກອົບຮົມວິຊາຊີບ ສົກຮຽນ 2023-2024 ແລະ ແຜນວຽກຈຸດສຸມ ປະຈໍາສົກຮຽນ 2024-2025; ເຊື່ອມຊຶມມະຕິຂອງລັດຖະບານ ສະບັບເລກທີ 09/ລບ, ລົງວັນທີ 17 ກໍລະກົດ 2023 ວ່າດ້ວຍນະໂຍບາຍ ແລະ ມາດຕະການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບ; ເຊື່ອມຊຶມມະຕິກອງປະຊຸມຜູ້ບໍລິຫານການສຶກສາ, ວິທະຍາສາດ ແລະ ກິລາທົ່ວປະເທດ ປະຈຳສົກຮຽນ 2023-2024 ສະບັບເລກທີ 282/ສສກ, ລົງວັນທີ 27 ກຸມພາ 2024.

ຜ່ານການຮັບຟັງ, ຄົ້ນຄວ້າ, ພິຈາລະນາ ແລະ ປະກອບຄໍາເຫັນຂອງບັນດາຜູ້ແທນກອງປະຊຸມ ແລະ ອີງຕາມທິດຊີ້ນຳຂອງທ່ານປະທານ, ກອງປະຊຸມໄດ້ຕົກລົງເຫັນດີ ຮັບຮອງເອົາເປັນມະຕິ ໂດຍເຫັນດີຮັບຮອງເອົາບົດສະຫຼຸບການຈັດຕັ້ງປະຕິບັດວຽກງານອາຊີວະສຶກສາ ແລະ ຝຶກອົບຮົມວິຊາຊີບ ປະຈໍາສົກຮຽນ 2023-2024 ແລະ ແຜນການປະຈຳສົກຮຽນ 2024-2025; ມອບໃຫ້ກົມອາຊີວະສຶກສາ ແລະ ບັນດາສະຖານອາຊີວະສຶກສາ ຜັນຂະຫຍາຍມະຕິ 9 ຂອງລັດຖະບານ ວ່າດ້ວຍນະໂຍບາຍ ແລະ ມາດຕະການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບ; ມະຕິກອງປະຊຸມຜູ້ບໍລິຫານການສຶກສາທົ່ວປະເທດປະຈຳສົກຮຽນ 2023-2024 ເຂົ້າໃນການວາງແຜນຈັດຕັ້ງປະຕິບັດກິດຈະກໍາ ປະຈໍາສົກຮຽນ 2024-2025; ມອບໃຫ້ກົມອາຊີວະສຶກສາ ສົມທົບກັບບັນດາສະຖານອາຊີວະສຶກສາ ສະໜອງການສຶກສາດ້ວຍຫຼາຍຮູບແບບ, ຫຼາຍທາງເລືອກ, ສອດຄ່ອງກັບຜູ້ຮຽນຫຼາຍຂຶ້ນ; ພ້ອມທັງນຳໃຊ້ວິທີການສອນ ແລະ ສື່ການຮຽນການສອນທີ່ຫຼາກຫຼາຍ; ຫັນວິທະຍາໄລ ແລະ ໂຮງຮຽນ ເຕັກນິກ-ວິຊາຊີບ ແບບປະສົມທີ່ມີຢູ່ໃຫ້ມີການສິດສອນແບບສາມັນວິຊາຊີບ; ເພີ່ມການແນະແນວວິຊາຊີບ ໂດຍນຳໃຊ້ທ່າແຮງຂອງອົງການຈັດຕັ້ງມະຫາຊົນໃນແຕ່ລະຂັ້ນ, ນຳໃຊ້ສື່ຕ່າງໆເພື່ອໃຫ້ຜູ້ປົກຄອງ ແລະ ນັກຮຽນໄດ້ຮັບຮູ້ ແລະ ເຂົ້າເຖິງສະດວກ ແລະ ທັນການ, ປັບປຸງສະພາບແວດລ້ອມຂອງສະຖານການສຶກສາໃຫ້ດີຂຶ້ນ; ເພີ່ມທະວີການຮ່ວມມືກັບພາກທຸລະກິດໃນການສ້າງຫຼັກສູດ ແລະ ປະຕິບັດຫຼັກສູດ ເປັນຕົ້ນແມ່ນຫຼັກສູດແບບຄວບຄູ່, ແບບເນັ້ນສະມັດຖະພາບ ແລະ ແບບຄູ່ຂະໜານ, ທັງຮຽນທັງສ້າງລາຍຮັບໄດ້ ແລະ ສະໜອງທຶນການສຶກສາແກ່ຜູ້ດ້ອຍໂອກາດຈາກແຫຼ່ງທຶນຕ່າງໆ.

ພ້ອມກັນນັ້ນ, ມອບໃຫ້ກົມອາຊີວະສຶກສາ ສົມທົບກັບພະແນກສຶກສາທິການ ແລະ ກິລາແຂວງ/ນະຄອນຫຼວງ, ພະແນກແຮງງານ ແລະ ສະຫວັດດີການສັງຄົມ ແລະ ສະຖານອາຊີວະສຶກສາໃນແຕ່ລະແຂວງ ເຮັດວຽກຮ່ວມກັບພາກທຸລະກິດ ຫຼື ນັກລົງທຶນລະດັບສູນກາງ ແລະ ທ້ອງຖິ່ນ ໃນການກໍານົດປະເພດແຮງງານທີ່ຕ້ອງການພາຍໃນແຂວງ ເພື່ອເປັນທິດທາງໃນການສ້າງທັກສະສີມືແຮງງານຮ່ວມກັນ; ສືບຕໍ່ມອບໃຫ້ພະແນກບໍລິຫານ ແລະ ຄົ້ນຄວ້າ-ສັງລວມ ສົມທົບກັບກົມການເງິນ ຄົ້ນຄ້ວານິຕິກໍາກ່ຽວກັບການສ້າງລາຍຮັບວິຊາການຮູບແບບຕ່າງໆ ເພື່ອກ້າວໄປສູ່ການກຸ້ມຕົນເອງທາງດ້ານງົບປະມານວິຊາການຂອງສະຖານອາຊີວະສຶກສາ; ສ້າງລະບົບກົນໄກການຊຸກຍູ້ ແລະ ຕິດຕາມແຜນພັດທະນາອາຊີວະສຶກສາຮ່ວມກັບບັນດາສະຖານອາຊີວະສຶກສາ; ມອບໃຫ້ພະແນກກວດກາຕິດຕາມ ແລະ ປະເມີນຜົນ ເປັນເຈົ້າການສົມທົບກັບສະຖາບັນພັດທະນາອາຊີວະສຶກສາ ວິໄຈຄວາມຕ້ອງການເຂົ້າຮຽນຂອງນັກຮຽນຕາມແຜນພັດທະນາເສດຖະກິດ-ສັງຄົມຂອງທ້ອງຖິ່ນ; ສ້າງແຜນສະໜອງເບ້ຍລ້ຽງນັກຮຽນໃຫ້ມີຄວາມເໝາະສົມ ທຽບກັບສະພາບເສດຖະກິດປັດຈຸບັນ; ປັບປຸງ ແລະ ພັດທະນາຫຼັກສູດ ລວມທັງຫຼັກສູດສາມັນວິຊາຊີບໃຫ້ແທດເໝາະກັບສະພາບຕົວຈິງ; ປັບປຸງຮູບແບບການຮຽນການສອນໃຫ້ສອດຄ່ອງກັບແຕ່ລະໄລຍະ ໂດຍສະເພາະຫຼັກສູດສາມັນວິຊາຊີບ; ຮ່ວມມືກັບສະຖານອາຊີວະສຶກສາພາກເອກະຊົນ ຜັນຂະຫຍາຍການຮຽນການສອນແບບສາມັນວິຊາຊີບ; ສືບຕໍ່ປັບປຸງນິຕິກຳຕ່າງໆ ເຊັ່ນ: ຂໍ້ຕົກລົງວ່າດ້ວຍການທົດສອບທັກສະວິຊາຊີບ, ຂໍ້ຕົກລົງວ່າດ້ວຍປະກາສະນີຍະບັດອາຊີວະສຶກສາ, ຂໍ້ຕົກລົງວ່າດ້ວຍການສອບເສັງ ແລະ ປະເມີນການຮຽນຈົບຫຼັກສູດອາຊີວະສຶກສາ.

ມອບໃຫ້ພະແນກພັດທະນາ ແລະ ຄຸ້ມຄອງບຸກຄະລາກອນອາຊີວະສຶກສາ ສົມທົບກັບສະຖາບັນພັດທະນາອາຊີວະສຶກສາ ແລະ ສະຖານອາຊີວະສຶກສາ ສືບຕໍ່ຄົ້ນຄວ້າສ້າງແຜນຊ່ວຍເຫຼືອຄູ ເພື່ອສະເໜີຂໍຕຳແໜ່ງວິຊາການຄູ ໃຫ້ໄດ້ 1% ຂອງຄູສອນວິຊາຊີບ; ປະເມີນແຜນກໍານົດພະນັກງານນໍາພາ-ຄຸ້ມຄອງ; ສ້າງແຜນນຳໃຊ້ຄູທີ່ມີຢູ່ ແລະ ແຜນຄວາມຕ້ອງການຄູໃໝ່; ສືບຕໍ່ຜັນຂະຫຍາຍຂໍ້ຕົກລົງວ່າດ້ວຍການຈັດຕັ້ງ ແລະ ເຄື່ອນໄຫວຂອງວິທະຍາໄລ ແລະ ໂຮງຮຽນອາຊີວະສຶກສາ ສະບັບເລກທີ 8576/ສສກ, ລົງວັນທີ 26 ພະຈິກ 2018; ສ້າງຄວາມເຂັ້ມແຂງ ແລະ ຍົກສູງຄຸນນະພາບຂອງຄູສອນທາງດ້ານວິຊາສະເພາະ ແລະ ວິຊາຄູ; ຈັດຕັ້ງປະຕິບັດຄໍາແນະນໍາກ່ຽວກັບການປະເມີນຜົນການປະຕິບັດໜ້າທີ່ຂອງຄູ ແລະ ຜູ້ບໍລິຫານສະຖານການສຶກສາ ສະບັບເລກທີ 1213/ສສກ, ລົງວັນທີ 01 ພະຈິກ 2022 ແລະ ຂອງພະນັກງານ-ລັດຖະກອນ ສະບັບເລກທີ 300/ລບ, ລົງວັນ 13 ກັນຍາ 2017; ມອບໃຫ້ກົມອາຊີວະສຶກສາ ສົມທົບກັບກົມສາມັນສຶກສາ ສືບຕໍ່ສ້າງຄວາມເຂັ້ມແຂງໃນການຈັດການຮຽນການສອນຫ້ອງຮຽນສາມັນວິຊາຊີບ ແລະ ນຳສະເໜີຂໍອະນຸມັດການຈັດການຮຽນການສອນສາມັນວິຊາຊີບຮູບແບບໃໝ່ ເພື່ອຈັດຕັ້ງປະຕິບັດ ໃນປີ 2025.

ມອບໃຫ້ພະແນກຄຸ້ມຄອງຂໍ້ມູນ-ຂ່າວສານ ແລະ ການຮຽນການສອນທາງໄກ ເປັນເຈົ້າການສົມທົບກັບສະຖານອາຊີວະສຶກສາ ແລະ ພາກສ່ວນກ່ຽວຂ້ອງສືບຕໍ່ປັບປຸງຖານຂໍ້ມູນຂ່າວສານຂອງອາຊີວະສຶກສາ ເພື່ອເຊື່ອມລະບົບຖານຂໍ້ມູນຂ່າວສານຕະຫຼາດແຮງງານຂອງກະຊວງແຮງງານ ແລະ ສະຫວັດດີການສັງຄົມ; ສ້າງຄວາມເຂັ້ມແຂງໃຫ້ວຽກງານແນະແນວວິຊາຊີບຂອງສະຖານອາຊີວະສຶກສາ; ສ້າງຂໍ້ມູນຂ່າວສານໃຫ້ມີຄວາມຫຼາກຫຼາຍ ເພື່ອເຜີຍແຜ່ນະໂຍບາຍລວມຂອງອາຊີວະສຶກສາ ແລະ ຝຶກອົບຮົມວິຊາຊີບ; ປັບປຸງນິຕິກຳທີ່ຈຳເປັນ ເພື່ອສະໜັບສະໜູນການຈັດຕັ້ງປະຕິບັດວຽກງານຂໍ້ມູນຂ່າວສານ ແລະ ການສອນທາງໄກ; ມອບໃຫ້ຫ້ອງການສະພາທີ່ປຶກສາອາຊີວະສຶກສາ ສືບຕໍ່ສົມທົບກັບສະຖາບັນພັດທະນາອາຊີວະສຶກສາ ແລະ ພາກທຸລະກິດ ສ້າງ ແລະ ປັບປຸງ ມາດຕະຖານອາຊີບ; ຈັດຕັ້ງປະຕິບັດກອງທຶນພັດທະນາອາຊີວະສຶກສາ; ຊຸກຍູ້ ແລະ ສົ່ງເສີມ ສະຖານອາຊີວະສຶກສາ ສ້າງຕັ້ງສະພາທີ່ປຶກສາຂອງສະຖານອາຊີວະສຶກສາ; ມອບໃຫ້ສະຖາບັນພັດທະນາ ເປັນເຈົ້າການຄົ້ນຄວ້າການກໍ່ສ້າງ, ບຳລຸງຄູ ແລະ ຄົ້ນຄວ້າວິໄຈວຽກງານພັດທະນາ ແລະ ຝຶກອົບຮົມວິຊາຊີບ ແລະ ກໍມອບໃຫ້ບັນດາສະຖານອາຊີວະສຶກສາ ເປັນເຈົ້າການສ້າງແຜນພັດທະນາສະຖານອາຊີວະສຶກສາ 5 ປີ 2026-2030; ສົ່ງບົດລາຍງານການປະກັນຄຸນນະພາບສະຖານອາຊີວະສຶກສາ.