ຮອງລັດຖະມົນຕີ ສສກ ລົງຕິດຕາມ ລົງຊຸກຍູ້ການສຶກສາຢູ່ເມືອງໄຊທານີ ໂອກາດເປີດສົກຮຽນໃໝ່ 2024-2025

ເນື່ອງໃນໂອກາດເປີດສົກຮຽນໃໝ່ 2024-2025 ທົ່ວປະເທດ ຢ່າງເປັນທາງການ, ທ່ານ ປອ ສໍາລານ ພັນຄະວົງ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ)  ໄດ້ລົງເຄື່ອນໄຫວຕິດຕາມ ແລະ ຊຸກຍູ້ວຽກງານການສຶກສາຢູ່ບັນດາໂຮງຮຽນໃນເມືອງໄຊທານີ ນະຄອນຫຼວງວຽງຈັນ ເມື່ອບໍ່ດົນມານີ້ ໂດຍມີທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ທ່ານ ດາວອນ ສິມມະລາວົງ ຫົວໜ້າຫ້ອງການສຶກສາທິການ ແລະ ກິລາ  ເມືອງໄຊທານີ  ພ້ອມຜູ້ອຳນວຍການໂຮງຮຽນ ແລະ ບັນດາຄູອາຈານໃຫ້ການຕ້ອນຮັບ.

ການເຄື່ອນໄຫວຕິດຕາມ ຊຸກຍູ້ການສຶກສາຂອງຮອງທ່ານ ລັດຖະມົນຕີ ສສກ ໃນໂອກາດເປີດສົກຮຽນໃໝ່ 2024-2025 ຄັ້ງນີ້, ແມ່ນເພື່ອເປັນການສົ່ງເສີມໃຫ້ຜູ້ບໍລິຫານການສຶກສາ ແລະ ຄູອາຈານ ເອົາໃຈໃສ່ໃນການຈັດຕັ້ງປະຕິບັດການຮຽນການສອນໃຫ້ມີຄຸນນະພາບ ແລະ ສາມາດໃຫ້ນັກຮຽນນັກສຶກສາເຂົ້າເຖິງການສຶກສາທີ່ມີຄຸນນະພາບ ແລະ ເທົ່າທຽບກັນ ເພາະການສຶກສາເປັນພື້ນຖານສຳຄັນຂອງທຸກໆອາຊີບ ແລະ ກໍານົດອະນາຄົດຂອງປະເທດຊາດເຮົາ.

ການລົງໄປຕິດຕາມຄັ້ງນີ້, ທາງເມືອງໄຊທານີ ໄດ້ເລືອກເອົາໂຮງຮຽນ ມສ ສາທິດ ແລະ ໂຮງຮຽນພູນສະຫວັດ ຊຶ່ງເປັນໂຮງຮຽນທີ່ມີຜົນງານດີເດັ່ນດ້ານການສິດສອນ, ດ້ານການຮ່ຳຮຽນ ແລະ ເປັນໂຮງຮຽນຕົວແບບຄຸນນະພາບຂອງເມືອງ ໂດຍໃຫ້ການຕ້ອນຮັບຂອງທ່ານ ນາງ ເອລາວັນ ນິຕິພົງ ຮອງອຳນວຍການ ໂຮງຮຽນ ມສ ສາທິດ ພ້ອມດຄະນະ, ຄູອາຈານ ແລະ ນ້ອງໆນັກຮຽນ, ທ່ານ ນາງ ວີຄຳ ແກ້ວວິໄຊ ຜູ້ປະກອບການ ທັງເປັນຜູ້ອຳນວຍການ ມສ ພູນສະຫວັດ, ທ່ານ ນາງ ພູນສະຫວັດ ພົງສະຫວັດ ຜູ້ອຳນວຍການໂຮງຮຽນອະນຸບານປະຖົມພູນສະຫວັນ.