ທີ່ຫ້ອງປະຊຸມກະຊວງ ສສກ (ຕຶກໄອຊີທີ) ໂດຍພາຍໃຕ້ການເປັນປະທານຂອງສະຫາຍ ປອ ສໍາລານ ພັນຄະວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ສະຫາຍ ບຸນມີ ຈັນທະອຸດົມ ຄະນະພັກກະຊວງ, ປະທານຄະນະກວດກາພັກກະຊວງ, ເລຂາໜ່ວຍພັກຮາກຖານ ທັງເປັນຫົວໜ້າກົມກວດກາ ກະຊວງ ສສກ ແລະ ສະຫາຍ ອິນທະວົງ ມະນີທອງ ຮອງປະທານຄະນະກວດກາພັກກະຊວງ, ຮອງເລຂາໜ່ວຍພັກຮາກຖານ ທັງເປັນຮອງຫົວໜ້າກົມຈັດຕັ້ງ ແລະ ພະນັກງານ ສສກ, ມີບັນດາເລຂາໜ່ວຍພັກຮາກຖານກົມອ້ອມຂ້າງ ສສກ, ຄະນະຜູ້ແທນສົມບູນ 18 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ 27 ສະຫາຍ (ມີສະມາຊິກພັກບໍານານ 8 ສະຫາຍ) ເຂົ້າຮ່ວມ.

ໂອກາດດັ່ງກ່າວ, ສະຫາຍ ບຸນມີ ຈັນທະອຸດົມ ໄດ້ກ່າວວ່າ: ກອງປະຊຸມໃຫຍ່ ຄັ້ງທີ VII ຂອງໜ່ວຍພັກຮາກຖານ ກົມກວດກາ ໄດ້ໄຂຂຶ້ນຢ່າງເປັນທາງການ ບົນພື້ນຖານການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງໜ່ວຍພັກຮາກຖານກົມກວດກາ ແລະ ອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນຊຸມປີຕໍ່ໜ້າ, ກອງປະຊຸມໃຫຍ່ໃນຄັ້ງນີ້ ຈະໄດ້ສະຫຼຸບຕີລາຄາການນໍາພາ-ຊີ້ນໍາຂອງຄະນະໜ່ວຍພັກຮາກຖານ ກົມກວດກາ ໃນໄລຍະ 5 ປີຜ່ານມາ ພ້ອມທັງຄົ້ນຄວ້າ, ຕີລາຄາ ແລະ ປະກອບຄໍາຄິດຄໍາເຫັນໃສ່ຮ່າງບົດລາຍງານການເມືອງ ແລະ ບົດສໍາຫຼວດການນໍາຂອງຄະນະໜ່ວຍພັກ. ຈາກນັ້ນ, ກອງປະຊຸມຈະໄດ້ພ້ອມກັນປ່ອນບັດຄັດເລືອກເອົາເລຂາ, ຮອງເລຂາ ແລະ ຜູູ້ກວດກາໜ່ວຍພັກຮາກຖານກົມກວດກາຊຸດໃໝ່.

ໃນກອງປະຊຸມ, ໄດ້ຜ່ານບົດລາຍງານການເມືອງ ຊຶ່ງຕະຫຼອດໄລຍະ 5 ປີຜ່ານມາ ໃນການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ VI ຂອງໜ່ວຍພັກຮາກຖານກົມກວດກາ ເຖິງຈະມີຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການກໍຕາມ ແຕ່ຄະນະພັກ, ສະມາຊິກພັກ ໄດ້ເຊີດຊູບົດບາດການນຳພາຂອງພັກ, ຍົກສູງຄວາມຮັບຜິດຊອບໃນໜ້າທີ່ການເມືອງຂອງຕົນ, ຮັກສາມູນເຊື້ອແຫ່ງຄວາມສາມັກຄີພາຍໃນ, ພາຍນອກໜັກແໜ້ນ, ມີຄວາມເປັນເອກະພາບ ແລະ ຢຶດໝັ້ນຕາມແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ນໍາພາສະມາຊິກພັກ, ພະນັກງານຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງໜ່ວຍພັກຮາກຖານກົມກວດກາ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກ ກະຊວງສຶກສາທີການ ແລະ ກິລາ, ໄດ້ຫັນເອົາເນື້ອໃນມະຕິດັ່ງກ່າວເປັນແຜນການ, ໂຄງການຈັດຕັ້ງປະຕິບັດໃນແຕ່ລະໄລຍະ ຊຶ່ງເປັນການປະກອບສ່ວນໃນວຽກງານການກໍ່ສ້າງພັກ-ພະນັກງານໃຫ້ມີຄວາມປອດໃສ ເຂັ້ມແຂງ ແລະ ໜັກແໜ້ນ ແລະ ກະຕຸກຊຸກຍູ້ຄະນະພັກ, ຄະນະນຳ, ສະມາຊິກພັກ, ພະນັກງານໃນການຍົກສູງຄວາມຮັບຜິດຊອບ ແລະ ເປັນເຈົ້າການໃນການປະຕິບັດໜ້າທີ່ວຽກງານຕາມການມອບໝາຍ, ໄດ້ປະກອບສ່ວນໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນຂະແໜງການສຶກສາ ແລະ ກິລາ. ພ້ອມກັນນີ້, ໜ່ວຍພັກຮາກຖານກົມກວດກາ ຍັງປະສົບຜົນສໍາເລັດໃນການຈັດຕັ້ງປະຕິບັດວຽກງານແຕ່ລະດ້ານ ໂດຍສະເພາະແມ່ນ ການນໍາພາ-ຊີ້ນຳດ້ານການເມືອງ-ແນວຄິດ; ການນຳພາ-ຊີ້ນຳວຽກງານກົງຈັກການຈັດຕັ້ງ, ພະນັກງານ ແລະ ປັບປຸງກໍ່ສ້າງພັກ; ການນຳພາດ້ານວິຊາສະເພາະ; ການນຳພາ-ຊີ້ນຳວຽກງານຕິດຕາມ ກວດກາ; ນໍາພາ-ຊີ້ນຳວຽກງານປ້ອງກັນຊາດ-ປ້ອງກັນຄວາມສະຫງົບ; ນໍາພາ-ຊີ້ນຳວຽກງານອົງການຈັດຕັ້ງມະຫາຊົນ ແລະ ການນໍາພາ-ຊີ້ນໍາວຽກງານຮ່ວມມືກັບຕ່າງປະເທດອີກດ້ວຍ.

ນອກຈາກນີ້, ໃນກອງປະຊຸມຍັງໄດ້ຜ່ານບົດສໍາຫຼວດການນຳພາລວມຂອງຄະນະພັກຮາກຖານ ກົມກວດກາ, ປະກອບຄໍາເຫັນໃສ່ບົດລາຍງານການເມືອງ ແລະ ບົດສໍາຫຼວດການນຳພາລວມຂອງຄະນະພັກຮາກຖານ, ຄະນະພັກຮາກຖານຊຸດເກົ່າກ່າວອໍາລາໜ້າທີ່, ຜ່ານມາດຖານ ເງື່ອນໄຂຜູ້ອອກສະໜັກເລືອກຕັ້ງຄະນະພັກຮາກຖານຊຸດໃໝ່ ແລະ ຜ່ານລາຍຊື່ບຸກຄະລາກອນທີ່ສະໝັກຮັບເລືອກຕັ້ງ, ຜ່ານມະຕິຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບການປ່ອນບັດເລືອກຕັ້ງ ສະໄໝທີ VII ແລະ ຂຶ້ນກ່າວຮັບໜ້າທີ່ ພ້ອມຜ່ານລະບຽບການປ່ອນບັດ, ດໍາເນີນການປ່ອນບັດ, ກວດນັບຄະແນນ ແລ້ວມອບຜົນຄະແນນໃຫ້ປະທານກອງປະຊຸມ ເພື່ອດຳເນີນການ ແລະ ໄດ້ເປີດກອງປະຊຸມຄັ້ງປະຖົມມະລຶກ ຊຶ່ງຜ່ານການເປີດກອງຄັ້ງປະຖົມມະລຶກ ໄດ້ເປັນເອກະພາບໃຫ້ສະຫາຍ ຄໍາອອນ ພອນປະເສີດ ເປັນເລຂາໜ່ວຍພັກຮາກຖານ ກົມກວດກາຊຸດໃໝ່,

ສະຫາຍ ຄໍາແສນ ໄຊຍະວົງ ເປັນຮອງເລຂາໜ່ວຍພັກຮາກຖານ ແລະ ສະຫາຍ ສຸກດາວອນ ມະຫາວົງ ເປັນຜູ້ກວດກາພັກຮາກຖານ.

ໃນໂອກາດນີ້, ສະຫາຍ ປອ ສໍາລານ ພັນຄະວົງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນໍາພະນັກງານສະມາຊິກພັກ ປະຕິບັດໜ້າທີ່ການເມືອງຂອງຕົນຈົນຍາດໄດ້ຜົນສໍາເລັດຫຼາຍດ້ານ. ພ້ອມກັນນີ້, ສະຫາຍ ຍັງໄດ້ສະແດງຄວາມເປັນຫ່ວງເປັນໃຍ ແລະ ຮຽກຮ້ອງໃຫ້ຄະນະໜ່ວຍພັກຮາກຖານ ກົມກວດກາ ຊຸດໃໝ່ ເອົາໃຈໃສ່ວຽກງານການເມືອງໃຫ້ໜັກແໜ້ນ; ປັບປຸງວຽກງານແນວຄິດໃຫ້ມີຄວາມອຸ່ນອ່ຽນທຸ່ນທ່ຽງ, ມີຄວາມສາມັກຄີພາຍໃນ-ພາຍນອກໃຫ້ກວ້າງຂວາງ; ກໍ່ສ້າງໜ່ວຍພັກໃຫ້ມີຄວາມເຂັ້ມແຂງທາງດ້ານການຈັດຕັ້ງ-ພະນັກງານ ຕິດພັນກັບການກໍ່ສ້າງບໍາລຸງ, ຄຸ້ມຄອງ, ຈັດວາງ, ຊັບຊ້ອນ ແລະ ນະໂຍບາຍຂອງພະນັກງານ; ກໍ່ສ້າງໜ່ວຍພັກໃຫ້ເຂັ້ມແຂງທາງດ້ານແບບແຜນວິທີການນໍາພາ, ແບບແຜນວິທີເຮັດວຽກ, ມີການແບ່ງຄວາມຮັບຜິດຊອບ, ເຮັດວຽກເປັນແຜນການ, ສະຫຼຸບ, ຖອດຖອນບົດຮຽນແຕ່ລະໄລຍະ; ສືບຕໍ່ຕິດຕາມວຽກງານຕິດຕາມ ກວດກາພັກໃຫ້ເປັນປົກກະຕິ ຊຶ່ງເປັນວຽກທີ່ສຳຄັນ ສາມາດຊອກໃຫ້ເຫັນໄດ້ດ້ານດີ, ດ້ານອ່ອນ ແລະ ກຳນົດວິທີການແກ້ໄຂໃຫ້ທັນການ; ສືບຕໍ່ວຽກງານອົງການຈັດຕັ້ງມາຫາຊົນ ສ້າງເງື່ອນໄຂໃຫ້ເໝາະສົມຕາມພາລະບົດບາດ ເພື່ອໝູນໃຊ້ທ່າແຮງຂອງອົງການດັ່ງກ່າວ.